Hawsaihpa a thipa zie hluhna lâ (IMR) liata Siaha District hmia a sah

Târi 19 Patô, 2023 liana khata DRDO's District Rural Resource Centre, Siaha liata Puhpa C.Lalrosanga, MP (Lok Sabha) nata DDCMC (DISHA) Chairman a châ pâpa sahlaota DDCMC/DISHA meeting hneipa châ ta, Siaha dist duasu nano nanopa saipa a châ. 

He meeting liana heta Department nano nanopazy ta ama deptt., nochâchyu tawhta ama hmahlana nata duasu Power Point Presentation palâsa ei ta, DISHA meeting siepahliepa ta ama rairunazy mokhei awpa ta ahawna ama tao hra.

He atyupahmaohna liana heta Line Deptt., nano nanopazy ta ama hmahlana nata duasu ama palâsana liata manôhzy nahcharao kawtuhpa cha -

Siaha district - liata PHC 4 ypa ta, 3 liata Dawhty y leipa ei ta, sub Centre 10 ypa ta, hezy liana heta Health Worker y tlâ vei ei. Atahmâ duasu liata Siaha district cha Mizoram district hry liata Hawsaihpa thi hluh chaina (IMR asâh chaina) a châ hai, tahpa meeting liata ama palâsapa cha a châ.

Kô 2022 tawhta kô 2023 Patô thla taihta Siaha District liata Hawsaih kô kha ry lâ athipa 35 y ei ta, Nô nawh chô liata athipa deikua y vei ei.

He bie he Lawngtlai CMO conference Hall liata National Health Mission, Mission Director Dr. Eric Zomawia, sahlaota Lawngtlai District nata Siaha District zy District Level Review Meeting a hneikheina liata palâsapa a châ.