Manipur buana : Chyhsa 54 ta hrona ama pahlei - Official

Manipur : Manipur buana liata he thâtih pachhuahpanoh hai no taihta hrona a pahleipa zie cha 54 ama châ, tahpa sawhkhâ biepuapa chata palâsa ta; biehnawh thokha, sawhkhâ pahnokhei leipazy ta he hlâta hrona pahleipa he ama hluh via, ama tah hai hra. Imphal Valley liata cha atanoh Pachyhnoh tawhna heta cha ziza chhao dia via ha ta, daohzy nata daohpipazy chhao pahy pathaopa châ ha bâ heih ta, lâthlôh liata ahluahtheipazy chhao amâ râhrei pathao ha hra.

Su nano nanopa liata pheisaih apielyupa hmô awpa hluh kaw ei ta; dâh nata phôh chalochabana kyh liata pheisaihzy ta ama tovyuh chyu liata hmah ama la hai hra.

Imphal liana heta daoh nata daohpipa hluh viapazy cha â pahy pathao ha ta; âhnalasipa nata nohto peimawhpazy chaleipa ta zawpi ama pua pathao ha hra.

Hrona a pahleipa 54 hryta 16 zy cha Churachandpur district hospital liata risona (morque) liata sopa châ ei ta; 15 zy cha Imphal liata Jawaharlal Nehru Institute of Medical Sciences Imphal liata sopa ama châ.

Regional Institute of Medical Sciences, Lamphel, Imphal West district liata athihpa ri 23 sopa a châ hra.

He hawhta a châ nona heta, Churachandpur district liata amâ kana liata riahrupa manôh 4 kasaopa châ ei ta, India Reserve Battalion pheisaih pano ta hmah ama phaoh hra.

Saiton, Churachandpur district liata pheisaihzy nata riahrupazy he a ka ei ta, he akana liana heta riahrupa 4 ama thi.

Pheisaih biepuapa ta a palâsana liata chyhsa maluh 13,000 tlai su a boh viana lâ palypa châ ei ta, thokha cha pheisaih su (Camp) lâ palypa ama châ. Churachandpur, Moreh, Kakching nata Kangpokpi district zy cha pheisaih kohkina ry liata ama y ha hra.

Social media nata biehnawh nano nanopazy ta a thipa zie he ama hluh kawpa hawhta ama reih hleikhôta, hmahphaohpa chhao ama hluh kawpa hawhta ama palâsapa cha, Police zy ta bietlohpa ta a pyh khoh vei ei.

Athihpa ri zy he Imphal East nata West, Churachandpur nata Bishenpur tawhtazy ama vaw tlôkhei via chai.

RIMS nata Jawaharlal Nehru Institute of Medical Sciences liata meithei ta ama kapa vâta hmah a phaohpa vâro tlai mohôhpa ama châ hra.

India pheisaih nata Assam Rifles maluh 10,000 hlei tlai Manipur buana kohki awpa heta palypangiapa châ ei ta, buana paru viana su zy liata sopa ama châ.

- Northeast Today