Manipur buana : State pôhpalôhpa liata Noh 5 chhôh Internet chalihsa

Manipur liata Meitei chiphozy nata tlâhchyhsazy likah liata buana a tlô pazao lymâpa vâta sawhkhâ chata District 10 liata kohkina (Curfew) phuahpa ta, 'mobile data' chhao state pôhpalôhpa liata Noh 5 chhôh hmâ thei lei awpa ta Pakhynoh tawhna khata a chalihsa hra. Pakhynoh khata Manipur liata tlâhchyhsa pahrâna viana District 10 liata pahrâpazy apôhkhana lâthlôh achhihna cha 'All Tribal Students’ Union Manipur (ATSUM)' pachhuahpanoh ei ta, Manipur liata chipho lai chaipa Meitei zy ta Scheduled Tribes (ST) liata a hlao hra awpa ta hmah ama lana cha ama kho leizie ama palâsa. He lâthlôh achhihna heta ziza pasâh via heihpa ta, buana lai viapa a pua hapa a châ. 

Kohkina (Curfew) he Churachandpur, Bishnupur, Imphal East, Imphal West, Jiribam, Pherzawl, Tengnoupal, Kakching,Kangpokpi nata Thoubal district liatazy phuahpa a châ.

Manipur home department ta ama reina dâh liata, "Chipho nano nanopa liata thyutliapazy atuvina nata atlahnaona a tlô” tahpa bie ama daozie ama rei.

ATSUM lâthlôh achhihna he my dawh 11am ta pathao ei ta, buana y leipa ta zâlâ dawh 1 nata 2pm liata patlôpa châ ta. Ama patlô tawhta daihti rei leipa liata buana lai viapa â thao hapa a châ.

Meitei chipho liata a hluh viapazy he, India dâhpipa ry liata OBC tlyma SC liata y ei ta, ST liata soh awpa ta kô 10 hlei ama vaw tei ha hrapa a châ.

He Meiteinahzy ta ST liata y awpa ta ama teina chhâ chaipa ta â lâpa cha “Mahnô mahpaw daihti no tawhta Meiteipazy râh a châpa ta ama pahnopa nata, ama chipho châna (ethnic identity) ama pabohsa khohpa vâta a châ chaipa ta â lâ”. L. Lokendra Singh, Working President, Scheduled Tribe Demand Committee of Manipur, chata, atahmâ duasu liata cha eima State chhôh liata râhzy he khôtho chyhsazy ta ama khota chalei thei ei ta, tahpa ta, “ST liata eima y tita cha, India dâhpipa ta miah pabohsa ha aw ta, eima State liata tlâhchyhsa pahrâna hawhta khôtho chyhsa ta râh chalei thei khao aw vei ei. Cha hawhna chata mahnô mahpaw daihti no tawhta eima râh cha eima pabohsa thei ha aw. Eima maluh he thysy 14 (lakh) rachhôh châ ta. ST eima châ khiah he heta eima râh nata eima chipho châna a pabohsa aw. He he eimâ chhuah chaipa a châ,” a ta.

Manipur liata tlâhchyhsa pahrâna liata khihpi lai chaipa, Churachandpur khihpi liata cha ziza sah kaw ta, Manipur sawhkhâ ta râh ruapa/râhhmâhpa achupasiapa ta, dâh pasaileipa ta a pahrâpazy papua awpa achhuahna a hneipa cha tlâhchyhsazy heta sawhkhâ ta tlâhchyhsazy tovyuh chhu awpa â chhuahna nata, tlâhchyhsazy cha-iechahmy achhuahna a châ, tahpa ta ama kho leizie ama palâsa. 

All Manipur Tribal Union (AMTU) General Secretary K. Lalboi Neihsial ta thâtihbu hnohta a reina liata cha, ATSUM ta lâthlôh amâ chhihna chhâpa cha, India sawhkhâ hnohta Meitei chipho cha ST list liata pahlao lei awpa ta bie a tana a châ, a ta.

Atahmâ duasu liata he Manipur liata Meitei chipho nata tlâhchyhsazy buana vâna heta O nata lyuzy mei raopa châ ta, ku a pathlana nata chaihrai ta a tlahnaona hleikhôta, hrona taihta pahleipa ama ypa hawhta reipa châ ta; thâtih siapa deikua pahno theipa châ mâh vei.