BOXING : Kô 2020 Olympics saituhpa Siaha Boxer NT BIAKKIMA
Feet 5 hlâta â sâh via hlei vei, châhrasala Siaha satlia NT Lalbiakkima, a chôpa pasazie cha Boxing dôhpa chhôh liata a hmiachhypazy ta ama pahnopasia chai aw. June thlãpâ liata Kazakhstan liata “India Boxing ta pahniena a topa hryta rônah chaipa.”tahpa ta chyhsa hluhpi ta ama reipa liata, Biakkima heta World no.1 nata Olympic champion Hasanboy Dusmatov, Uzbekistan cha 49 kg liata pahniepa ta, President’s Cup Tournament, Semi-Final â ngia hapa kha châ ta. Anodeikua vâdua a chhih kawpa ta Biakkima heta semi-final liata Kazakhstan boxer Ezahn a pahnie khao leipa kha a châ. Cháhrasala —râh hro lâta India vyuhpa ta â chô eikhana liata Medal a dao theipa Lalbiakkima heta India châta Bronze medal avaw dikhei pyly ta, tao pha leipa tah awpa la châ vei. Uzbekistan liata â pielyuna dâh heta, Boxing khizaw liata Biakkima heta keih a chakâ hmeiseih ha hra, tahpa a palâsa kaw.
“Uzbekistan liana khata Fixture ei hmôpa cha ei thlahzohpâ kaw hra,” tahpa ta Lalbiakkima chata, “A eikhana liata ei tlô khiahta cha, Olympic Champion Dusmatov ei hmiachhy aw tahpa ei pahnopa váta ei thlah bâhta a zohpâ hra” tah ta. Châhrasala pahnie topa ta, “4-1 ta Olympic champion, Gold medal vâro tlai avaw chôpapua hatuhpa pahniepa kha hmo nao kawpa la châ vei” a ta.
Lalbiakkima he Boxing liata kô 2009 tawhna khata avaw ngia pathao ta. Aizawl LPS ta Profight ama pachhuahpanoh tyhpa kha pahâh kawpa ta avaw moh tyh hra.
Biakkima heta Footballer châ awpa khoh tua ta, châhrasala Boxing lâ he tlao a sie hapa a châ. Chhôhkha rairu kaw hrapa tawhta laiseihpa, a paw hnatlâhna pha leipa nata, a nô ta ngasa zuahpa ta a chyh hrapa deita châ ta, sasuthliena pasâhsa muarua awpa chhao a châpa ta â lâ vei.
Kô 2015 liana khata, Biakkima heta Indian Navy, Indian Army, Indian Airforce nata Railways zy tawhta hruana hmô ta. Indian Navy he â pazao.
Khâpa vâta Indian Navy, â pazaopa ma a châ, tahpa hiahrihna cha, “Achhâpa cha ei boxer pasâhsa chaipa Suranjoy Singh chhao Indian Navy, liata a y hra châ” tahpa ta â chhy.
‘Little Tyson’, tahpa ama aw tyhpa, Singh he Manipur boxer châ ta, kô 2010 Commonwealth Games liata Gold Medal nata kô 2010 Asian Games liata Asian Bronze medal avaw la hapa a chã.
A boxer pasâhsapa Singh hawhta tlô pasãh awpa achhuahtuhpa Biakkima heta kô 2020 Olympics liata India vyuhpa ta pua cheingei hr'awpa ã chhuah ta. Tiamana nata hriapasana chôta â chhuahna tlô cheingei a chhuahpa ta thapi a phia hai.
Biakkima ta a thâtih a reina liata palôh a hria kawpa cha, “Ei pâ ta châ achu awpa ma ei khoh via, Boxing achu awpa maw tahpa kho na patlyhsa ta. A sâno ta achu pakaoh awpa khoh kaw hr'aw sala eima khihsana ta â pha vei tahpa ei pahno” tahpa ta, “Boxing ei tlyh hapa a châ” a ta. Khotlyna a tao pasu kaw..
