FORMALIN : NGASA ZUA AWPA A THU LEI N'AWPA TA AMA PAHLAO TYHPA HE KHATLUTA CHI Â CHHIH?

Atahmâhlâ eima Opa State Meghalaya nata State hropazy ta viah rãh lã tawhta Nga (Fish) lapangiapazy cha, thohna chichhihpa, hmo thi chiehpa thu thai lei awpa ta pasona - FORMALIN pahlaopa a chã, tahpa ta pakhâ ei ta, amâ hrohrua kaw.

He Formalin liata a ypa 'formaldehyde' ama tahpa he pasana 'cancer' tlôkhei theipa a châpa vâta ama chi kaw.

He formaldehyde he chyhsapa châta chichhih kawpa châ ta, a raihriana dâh tlâhpipazy cha :

* Pathi a parao (hepatic necrosis).

* Lôpo a parao (kidney damage).

* Pavyhpi chhôh lâ athata a parao (severe gastritis).

* Pati eima niepa vaw pathupazaotuhpa a parao (damage pancreas).

* Palichhipa nata luhpahiahpa a pa-ysa thei.

* Mo, hnapasu liata nata rao liata zy hmah taopa ta, cancer a pa-ysa thei.

Khohleikhona vâta chyhsapa ri a thuzao lei n'awpa ta ama hmã tyhpa cha Nga (Fish) nata chichei bialopa thlaita a rao lei n'awpa ta vaw hmâh lymâ ei ta. Cha hawhpa pahlaopa a niepazy châta cha, cancer tlôkhei theipa hmo ama vaw nie tahna a chã.

Khahlâ tawhta chhao viah râh lâ cha formalin hmâpa ta patohpatiapa NGA he vaw buakhei kaw tyh ei ta, atahmâhlâ chhao he ama buakhei kaw heih. Shillong-liata atliata liana khata Commissioner of Food and Safety-ta Nga ama zuapa nano nanopa 19 test ei ta, formalin he hmôpa a châpa vâta noh 15 chhôh cha ngasa zuapa ama pakhãpa a chã. Dâh paraopa ama y khiahta cha tlaw thysy 10 (lakh) taihta ama pacheisa aw ama ta.

Eima râh liana heta khâpa ma eima duasu châ vã tly? Eima hmo niepa, Ngasa dei leipa chhao Awhsa, Aosa zy taihta chhao mohpasia tyh sihla a pha kaw aw.