J&K : India sawhkhâ a pielyuzie ta Kashmir zawpi thlah a pazoh

Srinagar: Jammu and Kashmir liata sawhkhâ biehneituhpazy ta thla 2 a daih awpa beihchhona gas (LPG cylinders) Kashmir liata soh chhielie/pachô chhielie awpa nata, Ganderbal district liata achuna-O zy chhao pheisaihzy yna awpa ta parua awpa ta biepiepa 2 ama papuapa chata Kashmir zawpi thlah a pazoh kaw. He biepiepa he India nata China pheisaihzy Line of Actual Control  (Ladakh nochhi lâta LAC) liata ziza â sâh lichih nata Line of Control liata Pakistan-ta India a vaw ka ngâ lichihta papuapa a châpa vâta zawpi ama thlahzoh pachaih.

Sawhkhâ chata he biepiepa, LPG Cylinder pachô chhielie awpa kyh he chano a choh ngâthlâh hapa vâta Srinagar-Jammu National Highway ama khawpa vâta a châ tah ta. He biepiepa hawhpa pyly he zâkô ta Balakot liata riahrupazy ama tlahnao nona khata vaw papua ha ta, he hleikhôta India Dâhpipa liata Article 370 phiepa ta, J&K State Union Territory 2 lâta pachhaihpa a châ nona khata a vaw papua ha heih hra.

Sawhkhâ chata he LPG cylinder thla 2 a daih awpa pachô awpa tahpa cha ano leipa lâta zawpi ta ama pachâ, tahpa ta reipasiana thlaita ama papua aw, ama ta.

"He biepiepa he biepiepa yzie hnei leipa na a châ. Chasipaw châta hmo a ngiahpa pachô awpa ta tah na ta. Nopi daihti châta châ leipa ta. He kyh he Director, Consumer Affairs hnohta reihpasia awpa ta ei pahnosa aw," tahpa ta Farooq Khan, advisor to Jammu and Kashmir Lieutenant Governor, chata NDTV a chho.

Biepiepa hropa liata Ganderbal district liata siku-O 16, Srinagar-Ladakh lâlai chapiapa khih liata a ypazy parua awpa tahpa chhao Hindu zyhna zituhpazy khitlyna pathaihna 'Amarnath yatra' châta tahpa a châ tahpa ta Police lâ tawhta bie ama papua hra.

He hawhta sawhkhâ ta eikhapi ta biepiepa a papuapa heta Kashmir zawpi thlah pazoh ta, adyuhna châta India sawhkhâ achhuahnohna hawhta pachâpa ta, chihuna thlih a pathli hai.